सुर्खेतको बराहतालमा यात्रुबाहक गाडी दुर्घटना हुँदा १ जनाको मृत्यु र ५ जना घाइते भएका छन् । बिहिबार बिहान जुम्लाबाट सुर्खेततर्फ आईरहेको कर्णाली प्रदेश ०२२१ ख १०१४ नम्बरको एसएमल गाडी बराहताल गाउँपालिका–८ हुड्केमा दुर्घटनामा परेको हो ।
दैलेखको ठाटिकाध गाउँपालिका–४ का ३५ बर्षीय दीपक शाहीको मृत्यु भएको हो । गम्भीर घाइते उनलाई उपचारको लागि प्रदेश अस्पताल सुर्खेत पुर्याएको थियो ।
उनलाई अस्पतालले मृत घोषणा गरेको जिल्ला ट्राफिक प्रहरी कार्यालय सुर्खेतका प्रमुख प्रहरी निरीक्षक वकिल सुनारले बताए । घाइते सबैको अवस्था सामान्य रहेको र कर्णाली केयर अस्पतालमा उपचार भइरहेको उनले बताए ।
उनका अनुसार गाडीमा बच्चासहित २९ जना सवार थिए । तीव्र गतिमा रहेको गाडी अनियन्त्रित भइ सडक छेउमा पल्टिन पुगेको प्रहरी निरीक्षक सुनारले बताए ।
