सुर्खेतको पञ्चपुरी नगरपालिकाको नया प्रशासकिय भवनको आज एक कार्यक्रमका बिच उद्घाटन गरिएको छ । पञ्चपुरी नगरपालिका प्रमुख उपेन्द्र बहादुर थापा, उप प्रमुख मुक्ति रेग्मी लगाएत जनप्रतिनिधि तथा राजनैतिक दलका प्रतिनिधिको उपस्थितिमा भवनको उद्घाटन गरिएको हो ।
६ करोड ५९ लाखको लागतमा निर्माण भएको भवन केन्द्र सरकारको २ करोड ५० लाख र बाँकी नगरपालिकाको आन्तरिक स्रोत बाट निर्माण गरिएको हो ।रोयल कन्स्ट्रक्सनले निर्माणको ठेक्का पाएको सो भवनमा बालवालिका, जेष्ठ नागरिक र अपाङ्गता मैत्री समेत बनाइएको छ ।
उद्घाटन कार्यक्रममा नगर प्रमुख थापाले नगरपालिकाको आफ्नै भवनबाट एकीकृत सेवा प्रवाह र विकास निर्माणको कामलाई अझ चुस्त, सरल, सहज र प्रभावकारी बनाउन अव देखि थप सहज हुने बताउनुभएको छ ।
त्यस्तै नगर उप प्रमुख मुक्ति रेग्मीले नागरिकले नया भवनबाट सबै सेवा पाउने र नगरको कामका लागि अन्य शाखा हरुमा धाउनुपर्ने र धेरै समय कुर्नुपर्ने समस्याको अन्त्य हुने समेत बताउनु भयो ।
भूकम्प प्रतिरोधि सो प्रशासनिक भवनमा सभाहल सहित नगर प्रमुख, उपप्रमुख तथा प्रशासकीय अधिकृतका कार्यकक्ष, छुट्टै ‘मिनी मिटिङ हल’ तथा बिभिन्न शाखाका छुट्छुट्टै कोठा समेत रहेको छ ।
