सुर्खेतको पञ्चपुरीमा जारी चौथो पञ्चपुरी मेयर कप फुटबल प्रतियोगिता २०८० को उपाधिका लागि वडा नम्बर ५ र ६ भिड्ने भएका छन् । फागुन २४ गतेदेखि सञ्चालन भएको प्रतियोगिताको फाइनल खेल भोलि हुने आयोजकले जनाएको छ । नगरपालिका भित्रका १ देखि ११ वटा वडाका ११ वटा टिमको सहभागिता रहेको प्रतियोगितामा वडा नम्बर ५ र ६ प्रतियोगिताको फाइनलमा प्रवेश गरेका हुन् ।
फाइनल खेलका लागि भएको आजको खेलमा पञ्चपुरी नगरपालिका वडा नम्बर ६ र ८ बीचको खेलमा वडा नम्बर ८ लाई ० का विरुद्ध २ गोल गर्दै वडा नम्बर ६ फाइनल प्रवेश गरेको हो । त्यसैगरी वडा नम्बर ५ र वडा नम्बर १० बीचको खेलमा ट्राइबेकरमा पञ्चपुरी वडा नम्बर ५ ले वडा नम्बर १० लाई पराजित गर्दै फाइनलको स्थान पक्का बनाएको हो ।
प्रतियोगितामा प्रथम हुने टिमलाई नगद ५० हजार दोस्रो हुने टिमलाई नगद २५ हजार सहित मेडल प्रमाणपत्रको समेत व्यवस्था गरिएको छ । पञ्चपुरी नगरपालिकाको वडा नम्बर ८ को श्रीचौर खेलकुद मैदानमा सञ्चालन भएको फाइनल खेल भोलि बिहान ११ बजे सञ्चालन हुने आयोजकले जनाएको छ ।
