पञ्चपुरी नगर खेलकुद बिकास समितिको आयोजनामा पञ्चपुरीको पलैटेमा तेस्रो मेयरकप फुटबल प्रतियोगिता सञ्चालन हुने भएको छ । राष्ट्रका लागि खेलकुद, स्वास्थ्यका लागि खेलकुद भन्ने नारा सहित पञ्चपुरी नगरपालिकाको सहयोगमा माघ १६ गते देखि वडा स्तरीय फुटबल प्रतियोगिता हुने भएको हो ।
प्रत्येक बर्ष नियमित रुपमा सञ्चालन गर्दै आएको खेलकुद यो बर्ष पनि निरन्तर रुपमा हुने खेलकुद समितिका संयोजक कृष्ण रावलले जानकारी दिनुभएको छ । पञ्चपुरी नगरपालिका अन्तरगतका वडाका टिमहरुले प्रतियोगितामा भाग लिन पाउने आयोजकले जनाएको छ ।
रावलका अनुसार प्रतियोगितामा प्रथम हुने टिमलाइ नगद ५० हजार प्रमाणपत्र र मेडल तथा दोस्रो हुनेले नगद २५ हजार प्रमाणपत्र र मेडल पुरस्कारको ब्यवस्था गरिएको छ । प्रतियोगितामा भाग लिने वडाका टिमले माघ १४ गतेसम्म टिम दर्ता गरिसक्नुपर्ने आयोजकले सुचना जारी गरेको छ ।
